प्रधानाध्यापकको सन्देश

देश विकासको मेरुदण्डको रुपमा रहेको शिक्षा गुणस्तरीय सर्वसुलभ तथा निःशुल्क र सबैको पहुँचमा हुनु पर्नेमा कसैको फरक मत नहोला । शिक्षाको गुणस्तरीयतामा अभिवृद्धि गरी सर्वसुलभ तथा सबैको पहुँच वृद्धि गराउनका साथै विद्यालयलाई शैक्षिक, भौतिक, आर्थिक, सामाजिक, प्रशासकीय तथा व्यवस्थापकीय पक्ष लगायत सबै पक्षमा समय अनुकुल सुधार गर्दै लैजानु आजको आवश्यकता देखिन्छ । केन्द्रीकृत शैक्षिक प्रणाली तथा सुधारको प्रयत्नले भन्दा प्रत्यक्ष रुपमा सरोकार राख्ने सबै सरोकारवालाहरुको सहभागिता र सक्रियतामा निर्मित योजना मात्र वास्तविक योजना हुन जान्छ र अपेक्षा गरिएको लक्ष्य प्राप्तिको लागि एउटा सफल मार्ग निर्देशक बन्न सक्दछ । यिनै यथार्थतालाई मध्यनजर गरी सर्वपक्षीय भेलाबाट विद्यालयले उपलब्ध स्थानीय स्रोत र साधानको अधिकतम उपयोग गरी आफ्नो उज्वल शैक्षिक उन्नयन तथा शैक्षिक भविष्य सुनिश्चित गर्ने मुख्य योजनाका साथ विद्यालयले ५ वर्षे रणनीतिक योजना तयार गरेको छ ।
शिक्षाको मुख्य उद्देश्य बालबालिकाहरुको व्यवहार परिवर्तन गर्नु हो । बालबालिकाहरुको व्यवहार परिवर्तन हुनको लागि पहिला शिक्षक तथा अभिभावकहरुको व्यवहार परिवर्तन हुनु आवश्यक हुन्छ । सकारात्मक अभिभावन शिक्षा मार्फत प्रत्येक कक्षाका विद्यार्थीहरुका अभिभावकहरुलाई छुट्छुट्टै रुपमा अन्तत्र्रिmया गरी विद्यालय शिक्षाप्रति चासो जगाउने, आआफ्ना बालबालिकाहरुप्रति चासो बढाउने काम गरिने छ । जसले गर्दा बालबालिकाहरुमा सकारात्मक व्यवहार परिवर्तन भै सिकाइ उपलव्धि उच्च हुँदै जाने छ ।
विद्यार्थीहरुमा सकारात्मक परिवर्तन भै सिकाइ उपलव्धिसमेत उल्लेख्य मात्रामा बृद्धि हुनको लागि विद्यालयको समग्र वातावरण विद्यार्थीमैत्री हुनु आवश्यक छ । विद्यालयलाई रमाइलो घरको रुपमा विकास गर्न जरुरी छ । दैनिक पठनपाठनका साथै अतिरिक्त र सहक्रियाकलापहरु साप्ताहिक रुपमा सञ्चालन गरी विद्यार्थीहरुमा रहेको प्रतिभालाई प्रस्फुटनको अवसर प्रदान गरिने छ । हरेक शुक्रवारलाई पुस्तकरहित बनाई जीवनोपयोगी तथा व्यवहारकुशल सिपहरु सिकाइने छ ।
विद्यालय विद्यार्थीहरुलाई पठनपाठन गर्ने, सिप सिकाउने, प्रमाणिकरण गर्ने थलोमात्रै होइन, एउटा सुधारगृह पनि हो । तसर्थ जस्तोसुकै समस्या भएका बालबालिकाहरुलाई समेत सकारात्मक व्यवहारको माध्यमबाट सुधार गरी सक्षम, देशभक्त, ऊर्जाशील, स्वाभिमानी, स्वाबलम्बी नागरिक उत्पादन गर्ने थलो समेत हो । त्यसैले विश्व परिवेश सुहाउँदो र विश्व बजारसँग प्रतिस्पर्धा गर्न सक्ने नागरिक तयार गर्ने मुख्य उद्देश्यले कालिन्चोक माध्यमिक विद्यालयले विद्यार्थी, शिक्षक, अभिभावक, शिक्षक अभिभावक संघ, विद्यालय व्यवस्थापन समिति, शिक्षाप्रेमीहरु समेतको संयुक्त भेलाले रणनीतिक योजना २०८१–२०८६ तयार गरेको छ । यो रणनीतिक योजना कार्यान्वयनपछि विद्यालयले अपेक्षित उपलव्धि हासिल गर्ने विश्वास गरिएको छ ।